عوافي
وجمعة طيبة يا رب تقضوها بصلة الرحم
وطاعة رب العالمين ..
كل راس شهر نطلع احنا وبعض الخلان
وننشد الخلا ..
اليوم حاولت اعتذر قالي جاري ابو طراد
(البدوي العالمي 101)
قلي يمين طلاق بالثلاث غير تطلع معنا
انت خاطرك متكدر عشان الوحدات يا زم تابع
الدوري الايطالي مثلي وريح حالك ..
وترى ابو طراد يحب الوحدات مثل حبه
للفيصلي ومثل حبه لذات راس وسحاب
والبقعة ..
لانو ما يتابع دورينا ومبلي باشي اسمه
يوفنتس
المهم ولعنا النار كالعادة وكان معنا جارنا
الاستاذ سليم العجوري
قلي : شوف ابو جروح انت تدري ما الي
عالطابة ،، بس انا اقلك ليش الوحدات
ما فاز بالدوري
سمعت بابن خلدون ؟
قلتله : لأ ما سمعت بيه
مين ابن خلدون ؟
قلي انا اقلك ابو جروح
ابن خلدون اللي اسس علم الإجتماع
حكيتله : علم الاجتماع مثل علم النفس ؟
قلي : طبعا لأ
علم النفس يدرس الفرد
بس علم الإجتماع يدرس الجماعة (المجتمع)
دراسة علمية تعتمد على البحث والتفصيل
حكيتله : مش فاهم إشي !!!!
قلي : انا اوضحلك ابو جروح
ابن خلدون اللي مات سنة 808 للهجرة
يقول ان اي مجتمع وبداخلة اي جماعة
او فريق او مجموعة يربطها رابط سياسي
اجتماعي وقيس عليه رياضي
اي جماعة تمر بدورة حياة مثل دورة الحياة
اللي يمر بيها الإنسان او حتى النبات
قلتله : ولا فاهم إشي !!!
قال : بسيطة اوضحلك أكثر
رح اوضحلك علاقة ضياع الدوري من الوحدات
من خلال نظرية ابن خلدون
قلتله : اترجاك على قد ما تقدر بسطلي اياها
قلي : تبشر ابو جروح
الوحدات : واللي يسولف الاستاذ سليم
مرق بأكثر من دورة للوصول للقمة مرة
بالتسعينات ،، ومرة ببداية الالفية وآخر مرة
كانت بآخر عشر سنوات
بكل مرة يمر الوحدات باكثر من مرحلة
لحتى يوصل للقمة
المرحلة الأولى :
مرحلة العصبية والإنتماء لشعار النادي
وهون كان فيصل ابراهيم رأفت علي ،
وعامر (شفيع وذيب) وشلباية وغيرهم
ّ
اخذوا الدوري بس ما وصلوا للقمة
المرحلة الثانية :
مرحلة الاستبداد والإسئثار بالسلطة والقيادة
وهاي خاصة بإدارة النادي من خلال سيطرة
الريس خوري على مقاليد القيادة
والمحافظة على الطاقم الموجود ،
وهاي المرحلة الوحدات احتكر البطولات
بس ما وصل للقمة
المرحلة الثالثة :
مرحلة الرخاء والحصول على المزيد من
البطولات وتجديد دماء الفريق
وهاي تولاها ابو زمع بعد ما باع الوحدات
اعمدته الرئيسية وبلش يطلع جيل كان
بسرعة ينضم للمنتخب مثل رجائي والاخوين
سريوة وصالح راتب والبشتاوي وغيرهم
اندمجوا مع القائد الملهم ومساعديه
المخلصين (شلباية وعامر )
وهون الوحدات وصل القمة
المرحلة الرابعة :
مرحلة اعتزال رأفت واللي صار فيها
الفريق يعيش عالصيت وتقليد رأفت والعيش
على ذكراه مع تراجع الانتماء والفساد اللي
دب بالفريق بعد ما راح ابو زمع وبلشنا
نقعد الشباب اللي طلعهم ابو زمع مثل صالح
ورجائي والاخوين سريوة وابو كبير
والاخوين رجا ،، صرنا نقعدهم عالبنش بدون
سبب وهون كنا بالقمة واخذنا الدوري
بسبب ضعف الآخرين
وهون حفاظنا عالقمة كان هش
المرحلة الخامسة :
الترجل عن القمة بسبب الإسراف والتبذير
تعاقدات مع مدير فني بمبلغ خيالي
وانعدم الإنتماء وانشغال مجلس الادارة
بشؤون الانتخابات اكثر من الاهتمام
بشؤون الفريق
سألت الأستاذ والحل .. ؟
قال من عادة المجتمات الصالحة انها تعمل
Rebuilding
لأجهزتها المختلفة وهذا اللي كان يعمله
الوحدات بعد كل مرة يترجل فيها عن القمة
كان يرفع جيل جديد ،، هذا الجيل يحاول
يثبت انتماءة
وتبدأ الدورة مرة ثانية بوجود رمز جديد
يمكن يكون عامر شفيع هون يلعب دور رأفت
علي او منذر ابو عمارة
وخلي بالك ابو جروح يمكن اندية ثانية
تلعب دور الوحدات اذا ما تم التخطيط
السليم
كأبو جروح شخصياً
وان شالله امون على معظم
الوحداتية رح نكون اول المباركين
للجزيرة او الفيصلي
ورح نقتحم صحفهم ونحط احلى تبريكات
تعبر عن أخلاقنا ورح نقتحم بريدهم الخاص
وننثر فيه احلى باقات الورود والفل
والياسمين
اخوكم
ابو جروح شخصياً
