صح بدنهم ..
اولاً كعادة كل وحداتي خليني أبارك للنادي
الفيصلي ممثل برئيسه معالي الشيخ
سلطان العدوان وجماهيره بالفوز الصريح
والمستحق على شقيقهم نادي شباب الاردن
لفت انتباهي الاداء الجماعي الجميل للاعبين
الفيصلي والقدرة لاول مرة لتسجيل اهداف
على طريقة خذ وهات او زي ما يسميها
البعض التيكي تاك ..
هذا الاداء ذكرنا بالفيصلي المنافس الشرس
للوحدات ايام ما كان الدوري مرة النا ومرة
الهم .. ماخذينها دورية ،، وكل عشرة اطنعشر
سنة يسمحوا لنادي يدخل عالخط ويعطوه
لقب ..
وشكله والعلم عند الله انو الجزيرة ناويها
هاي السنة ..
ويمكن واحد يقلي اخي الفيصلي مرعب من
اول الدوري اقله :
اخوي .. الفيصلي تبع مباراة امس غير هو
نفسه الفيصلي ايام خالد عوض واخوانه
هو الفيصلي تبع ابو عابد وتبع حسونة لما
كان معه حاتم وخالد سعد ومؤيد سليم
والدليل على كلامي انو الفيصلي لعب 16
مباراة سجل فيهم 16 هدف بمعنى هدف لكل
مباراة ، بس أمس سجل خمسة بمباراة وحدة
وللامانة الفيصلي خسر فلوس كثير بتعاقدات
غير مجدية ، لكن ربنا وفقهم اخيرا بالتعاقد
مع لوكاس والخطير الزوي
عودة الفيصلي القوية مفيدة للمنتخب الوطني
والمستفيد الاول والاخير منها هو الوحدات
ليش الوحدات .. ؟
لانه رح يخلق عند لاعبين الوحدات روح
التحدي واعطاء مخرجات داخل الملعب هاي
المخرجات كان غايب لا يقل عن 30%
منها بسبب ابتعاد الفيصلي عن المنافسة
بي شك يلف براسي انو مباراة امس ممكن
تعطي مؤشرات خادعة
Deceptive indicators
للجهاز الفني ولإدارة وجماهير الفيصلي
لانه غيابات الشباب اصابته بمقتل ولو رجعنا
لاهداف الفيصلي رح نلاقيها كلها من مكان
تمركز محمد الباشا ورواد ابو خيزران
هون اخواني مش لازم نغفل حظوظ الجزيرة
اللي بحساب النقاط هي الاوفر ،،
والسبب آخر لقائين للقطبين انتهوا بالتعادل
فلو تعادلوا .. الجزيرة عالدعسة رح يظل
ماشي باتجاه المنصة ولا رح يطلع وراه
عموما مباراة القطبين القادمة تعد الأهم
محليا تبعاً لحسابات فرق المقدمة والأهم
من كل هذا وهذاك انه نستمتع بمباراة هجومية
مفتوحة ،، بصراحة الوحدات مش من عادته
يغلق الملعب والفيصلي ما اله مصلحة يغلق
ملعبه ..
نتمناها اخوية بالملعب والمدرجات لانه اكيد
المباراة رح تحظى بمتابعة من اكثر من دولة
واكيد رح تتغطى اعلامياًّ بشكل كويس
اخوكم
ابو جروح شخصياً
