عوافي ..

قبل اكم يوم كتبت موضوع شارك فيه أحد

الأخوة الأفاضل بمشاركة لسعني فيها بالعقل

الشب عدد ايام انضمامه لكورة بالآلاف ..

لكن لاحظت يمكن اله سنين ما شارك 

راسلته عالخاص بدي اوضحله وجهة نظري 

فاجأني وحلل شخصيتي كانه عايش معي 

نكشته أكثر لانو اسلوبة بالكتابة والردود 

عجبني كثير 

فقلي ابو جروح بدي احكيلك قصة :

حكيتله تفضل 

قال : سجلت بالمنتدى من سنين انا وصديق

وكل واحد فينا بشجع فريق 

وامضينا فيه سنين واحنا كل همنا المناكفات

والإساءات خسرنا شباب ،، وزعلنا شباب

وعملنا اللي يخطر عبالك واللي ما يخطر 

 ولكن بلحظة قلنا شو اللي قاعدين نساويه

فقررنا مغادرة المنتدى ، لحتى ما تتراكم 

ذنوبنا .. 

وفعلا النا اربع خمس سنوات مقاطعين 

فاجأني هذا الشاب بان صديقه ورفيق عمره

اللي سجل معه بالمنتدى توفاه الله سبحانه 

وتعالى من شهر ونصف 

وما ذكرلي كيف مات .. 

ويضيف بكيت عليه بكاء شديد وحكا 

جملة انا اخذتها منه :

(ضاقت علي الارض بما رحبت) 

شو بدي أساوي بعد ما مات صاحبي 

حياتي مبرمجة معه ، وطلعاتنا وسفراتنا

وعمراتنا مع بعض ،، اكلاتنا مع بعض 

ورحلاتنا مع بعض ،، بنفرح مع بعض ويوم

نزعل نزعل مع بعض كثير ناس كانوا يسألونا

انتم اخوان .. ؟

انتم توأم .. ؟ 

تذكرت للحظة الأشياء اللي كنا نساويها

بالمنتدى 

فحبيت اقدم لصاحبي شغلة غير الدعاء له

والصدقة وغيرها 

قلت بدي ارجع المنتدى وبدي اتصل بكل

واحد اسأناله واترجاه يسامح صديقي

ويسامحني انا كمان .. 

مهما كلفني الثمن ..

هون  كأبو جروح شعرت قديش الشب متأثر

مش بس لانو صاحبو مات .. لأ

لانو شعر بندم شديد على اللي كانو بساووه

بالمنتدى 

وكمان لانو يرجو الرحمة والمغفرة ومتأمل

بخصومهم اللي ناكفوهم ان يتكرموا عليه

وعلى صديقه بالمسامحة .. 

شخصيا شعرت مع كل كلمة من كلامه

في صرخة الم ..

شعرت بكل جملة قالها في 

مساحة ندم ..

شعرت انه يكتب بدموعه

وما يكتب بالقلم ..

شعرت بالبكاء والصراخ 

شعرت اني قدام انسان بائس

محطم ..

اشعرتني كلماته كم كان ظالم لنفسه

وكأنه بات في حكم المتهم .. 

شعرت من كلامه قديش بعض

تصرفاتنا خلتنا نعيش

بمرض وهبل و وهم .. 

شعرت مع كلامه انو يبكي لكن

دموعه بلون الدم .. 

أكبرت فيه هاي المشاعر وقلت :

آااخ يا حسرتي

لو اقدر اكسر الجهاز واطولك 

لقبلتك بين عيونك ولمسحت دمعك 

مع حضن دافي يقلك :

الله يسامحك وقول لصاحبك ..

انو مهما اسأنا لبعض فإحنا النشاما

اللي قلوبنا بيضه ، ما تعرف الحقد والضغينة

وبلغه انو حقه علينا اللي ما سألنا عنه

لما غاب عنا 

وبلغه انه احنا مش معصومين وانه كل

واحد بينا يغلط وانا كأبو جروح اولكم 

قله ترا الشباب مسامحينك دنيا وآخرة

وان شالله ربنا يقبلك عنده بأحلى

مكان يتمناه كل واحد بينا .. 

أخوكم ابو جروح ..